Türkmenistanyň hödürlän “Türkmen alabaý itlerini ösdürip ýetişdirmek sungaty” atly hödürnamasy Adamzadyň maddy däl medeni mirasynyň sanawyna girizildi. Bu barada gutarnykly çözgüt 11-nji dekabrda Hindistanyň Nýu-Deli şäherinde geçirilýän ÝUNESKO-nyň Maddy däl medeni mirasy goramak boýunça hökümetara komitetiniň 20-nji mejlisiniň çäklerinde kabul edildi.
Bu çözgüt Komitetiň 24 agzasynyň ählisi tarapyndan biragyzdan goldanyldy. Bu bolsa garaşsyz bilermenleriň we ÝUNESKO-nyň baha beriş toparynyň ýokary we oňyn seljermesine esaslanýar.
Türkmenistanyň ÝUNESKO-nyň işleri boýunça Milli toparynyň Sekretariaty tarapyndan “Türkmen alabaýlary” Halkara assosiasiýasy bilen bilelikde taýýarlanan hödürnama bukjasyna ussatlaryň, itşynaslyk bilen meşgullanýan maşgalalaryň, alym-barlagçylaryň, şeýle hem alabaý itlerini ösdürip ýetişdirmegiň meşhur bilermenleriniň we muşdaklarynyň giňden gatnaşmagy girizildi. Munuň özi hödürnamanyň taýýarlanylyşynda bu däbi dowam etdirýän adamlaryň işjeň gatnaşmagynyň nusgalyk mysaly hökmünde bellenildi we bu ugurda aýallaryň möhüm ornuna aýratyn üns berildi.
Döwlet syýasatynyň çäklerinde ýerli häkimlikler, jemgyýetçilik guramalary we däbi dowam etdirýänler bilen ysnyşykly işleşip, bu sungaty goramak boýunça toplumlaýyn we yzygiderli çärelere ýokary baha berildi. Bu çäreler türkmen alabaýlaryny ösdürip ýetişdirmegiň gadymy däpleriniň durnuklylygyny üpjün edýär we nesilleriň dowamatlygyny berkidýär.
Mejlisiň dowamynda döwletleriň Konwensiýanyň çäginde dürli sanawlara girizmek üçin hödürlän 66 milli we köpmilli hödürnamalar ara alnyp maslahatlanyldy. Olardan 54-si Adamzadyň maddy däl medeni mirasynyň sanawyna, 11-si Gyssagly goraga mätäç maddy däl medeni mirasyň sanawyna, 1-i Maddy däl medeni mirasy gorap saklamak boýunça iň gowy tejribeleriň sanawyna girizilmäge hödürlenendir.
Hökümetara komitetiniň mejlisiniň işi şu ýylyň 13-nji dekabryna çenli dowam eder.
