29 ýaşly braziliýaly telekeçi, Kalshi platformasyny esaslandyryjylaryň biri Luana Lopes Lara baýlygyny öz güýji bilen gazanan dünýäde iň ýaş zenan milliarder boldy. Bu barada Forbes USA habar berýär.
Lopes Lara Kalshi platformasyny maliýeleşdirmegiň täze tapgyryndan soň milliarder statusyny aldy. Bu tapgyryň dowamynda kompaniýa 1 mlrd dollar maýa çekdi. Platforma 11 mlrd dollar bilen bahalandyryldy, şol bir wagtyň özünde esasy maýadar bolup Paradigm firmasy çykyş etdi. Kalshi-niň bahasy soňky ýarym ýylda bäş esseden gowrak ýokarlandy. Esaslandyryjylar hökmünde çykyş edýän Lopes Lara bilen Tarek Mansuryň paýlary, takmynan, 12%-e barabar bolup, bu olaryň her biriniň baýlygyny 1,3 mlrd dollara ýetirdi.
Luana Lopes Lara Braziliýada matematika mugallymy bilen elektrik inženeriniň maşgalasynda dünýä indi. Ol Massaçusets tehnologiýa institutynda (MIT) kompýuter ylymlaryny öwrendi we bu ýerde biznes boýunça hyzmatdaşy Tarek Mansur bilen tanyşdy.
Kalshi platformasy wakalary çaklamak üçin gurallary döretmäge ýöriteleşýär. Ol treýderlere maýa goýum strategiýalaryny işläp düzmekde saýlawlaryň netijeleri ýa-da tebigy howplaryň ýüze çykmak ähtimallygy ýaly daşarky faktorlary üns merkezine almaga mümkinçilik berýär.
