ByteDance tehnologiýa kompaniýasynyň esaslandyryjysy Çžan Imin «Forbes» žurnalynyň täze reýtinginde Hytaýyň iň baý adamy diýlip ykrar edildi. Onuň baýlygy 69,3 milliard dollar möçberinde bahalandyrylýar, bu bolsa telekeçä dünýädäki milliarderleriň sanawynda 26-njy orny eýelemäge mümkinçilik berdi.
Çžan Imin baýlygy 68,1 milliard dollar bolan «Nongfu Spring» kompaniýasynyň başlygy Çžun Şanşany yzda galdyrdy. Ol dünýä reýtinginde 27-nji orunda durýar. Hytaýyň iň baý adamlarynyň arasynda üçünji orny 53,8 milliard dollar maýasy bilen «Tencent» korporasiýasynyň ýolbaşçysy Ma Huaten eýeleýär.
ByteDance kompaniýasy maslahat beriş algoritmlerini işläp düzmek we öz sanly platformalaryny halkara bazarlarynda işjeň ösdürmek bilen tanalýar. «Nongfu Spring» sarp ediş harytlary pudagynda öňdebaryjy orunlary eýeleýän bolsa, «Tencent» internet hyzmatlarynyň ekoulgamyny ösdürýär we emeli aň tehnologiýalaryny ornaşdyrýar.
Hünärmenler Hytaýyň tehnologiýa kompaniýalarynyň ornunyň berkemegini emeli aňyň ösmegi we onuň sanly hyzmatlarda ulanylmagy bilen baglanyşdyrýarlar. ByteDance we Tencent ulanyjylaryň öz önümlerine bolan gyzyklanmasyny artdyrmak üçin maglumatlary işlemek algoritmlerini we generatiw modellerini ulanýarlar.
Kompaniýalaryň maliýe görkezijilerine Hytaýyň pudagy kadalaşdyrmak baradaky döwlet syýasaty hem täsir etdi. Analitikleriň bahalandyrmasyna görä, iri oýunçylaryň arasyndaky dempinge we nyrh söweşlerine garşy görlen çäreler bazaryň durnuklaşmagyna hem-de tehnologiýa taslamalarynyň girdejiliginiň artmagyna ýardam etdi.
