Apple korporasiýasy maşyn bilimini we emeli aňy ösdürmek boýunça strategiýany işläp taýýarlamaga jogap berýän Apple Intelligence bölümçesindäki üýtgeşmeler barada habar berdi. Muny The Guardian ýetirýär.
Bölüme ýedi ýyl ýolbaşçylyk eden Jon Jannandrea işden çykaryldy. Indi onuň ornuny EA gurşawynda tejribeli hünärmen Amar Subramanýa eýelär.
Mälim bolşy ýaly, Apple emeli aň pudagynda beýleki bäsdeş tehnologiýa ägirtleri bilen deňeşdirilende yza galýardy. Kompaniýa bu ugurda, hakykatdan-da, görnetin ösüş görkezmedi. Şol sebäpli Jannandreanyň hem işden çykaryljakdygy baradaky gürrüňler köpden bäri dowam edýärdi.
2024-nji ýylyň tomsunda görkezilen Apple Intelligence tehnologiýalar toplumy ýeterlik derejede çalt ösmedi we köp babatda bäsdeşlerden ep-esli yza galdy, düýpli täze funksiýalary işläp düzmek bolsa köp wagt talap edýärdi. EA-nyň esasynda işlemeli bolan Siri ses kömekçisiniň täzelenen wersiýasy hem gijikdirildi. Apple-iň ýolbaşçylygy muny işi ýokary hilli etmegiň zerurlygy bilen düşündirdi, şol sebäpli täzelenen Siri-niň çykmagy geljek ýylyň ýazyna goýuldy.
Bölümiň täze başlygy Amar Subramanýa kompaniýa geçmezden ozal Microsoft-da EA boýunça korporatiw wise-prezident bolup işledi. Şeýle-de karýerasynyň 16 ýylyny Google-da geçirip, häzir pudakda öňdebaryjy hasaplanýan Gemini EA kömekçisiniň işlenip taýýarlanmagyna ýolbaşçylyk etdi. Belki, onuň tejribesi Apple kompaniýasynyň bäsdeşlerden yza galmak ýagdaýyny düzetmäge mümkinçilik berer. Amar işläp taýýarlamak boýunça ýolbaşçy Kreýg Federiginiň öňünde hasabat berer.
