Türkmenistanyň gurluşyk we binagärlik ministri A.Geldiýewiň ýolbaşçylygyndaky wekiliýet Dubaýda geçirilýän «Big 5 Global 2025» atly halkara sergisine gatnaşýar.
Pudagyň wekilleri serginiň resmi açylyş dabarasyna we Global Leaders' Summit atly umumy mejlise gatnaşdylar. Onda gurluşygyň, infrastrukturalaryň, sanly modelirlemäniň we modul jaý gurluşyk tehnologiýalarynyň ösüşiň geljegi ara alnyp maslahatlaşyldy.
Iş saparynyň birinji gününde wekiliýet BAE-niň resmi adamlary, dmg events kompaniýasynyň ýolbaşçylary we halkara gurluşyk hem-de inženerçilik kompaniýalarynyň wekilleri bilen duşuşyklar geçirdi. Gepleşikler senagat gurluşygy, häzirki zaman inženerçilik çözgütlerini ornaşdyrmak we Türkmenistanda infrastruktura taslamalaryny durmuşa geçirmek ýaly ugurlarda hyzmatdaşlyk mümkinçiliklerine bagyşlandy.
Saparyň maksatnamasynyň çäginde wekiliýet Saud Arabystanynyň, Türkiýäniň we Hytaýyň milli pawilýonlarynda boldy. Türkmen hünärmenleri uly şäher we senagat desgalarynyň gurluşygynda ulanylýan tehnologiki çözgütler, täze materiallar, modul ulgamlary we enjamlar bilen tanyşdylar.
Şeýle-de, wekiliýet EPC-potratçylar, modul gurluşyk kompaniýalary, sanly we BIM-platformalary işläp düzüjiler, gurluşyk materiallaryny we tehnikasyny öndürijiler, öňdebaryjy binagärlik-inženerçilik býurolary bilen birnäçe gepleşikleri geçirdi.
«Big 5 Global» sergisiniň gatnaşyjylary noýabr aýynda Awazada bolup geçen, Türkmenistanyň gurluşyk, senagat, himiýa we energetika pudaklarynyň ösüşine bagyşlanan CIET 2025 halkara maslahatyna we sergisine ýokary baha berdiler. Daşary ýurtly hyzmatdaşlar guralyş derejesini belläp, geljekki hyzmatdaşlyga gyzyklanma bildirdiler. Gyzyklanma bildirýän kompaniýalara indiki CIET 2026 sergisine çakylyk berildi.
Türkmenistanyň «Big 5 Global 2025» sergisine gatnaşmagy halkara gatnaşyklaryny giňeltmäge, tejribe alyşmaga we dünýäniň gurluşyk we tehnologiýa kompaniýalary bilen özara hereketi güýçlendirmäge ýardam edýär.
