Planetanyň "ýaşyl öýkeni" roluny ýerine ýetirýän tokaýlar kömürturşy gazyny özüne siňdirýär we kislorod çykarýar. Mundan başga-da, olar öz ekoulgamlaryny we suw aýlanyşyny döredip, müňlerçe kilometr uzaklykdaky sebitlere täsir edýärler. Soňky onýyllyklarda Amazoniýa millionlarça gektar tokaý ýitiren mahaly, birnäçe ýurt tokaý meýdanlaryny işjeň dikeldýär.
BMG-niň Azyk we oba hojalygy guramasynyň (FAO) maglumatlary esasynda taýýarlanan täze infografika, 2015-nji ýyldan bäri tokaý meýdanyny artdyrmak üçin iň köp tagalla eden ýurtlary görkezdi.
1970-nji ýyllardan bäri Hytaý "Uly ýaşyl diwar" başlangyjynyň çäginde ýüzlerçe müň, hatda millionlarça agaç ekdi. Bu maksatnama Gobi we Takla-Makan çöllükleriniň şäherlere tarap ilerlemegini duruzmaga gönükdirilendir. Taslamany 2050-nji ýyla çenli tamamlamak meýilleşdirilýär, ýöne onuň netijeleri jedelli hasaplanýar: käbir sebitlerde agaçlar gowy kök urup bilmeýär. Muňa garamazdan, 2015-nji ýyldan bäri Hytaýda tokaýlaryň arassa ösüşi 1,7 million gektar boldy.
Russiýa on ýylyň içinde 942 000 gektar ösüş bilen dünýäde ikinji orny eýeleýär. Muňa 2018-nji ýyldan başlap tokaý meýdanlarynyň ösüşini çaltlandyrmak boýunça başlanan milli çäreler ýardam berdi.
Hindistan hem tokaýlary dikeltmek boýunça uly maksatlary durmuşa geçirýär. Howa üýtgemegi boýunça borçnamalaryň çäginde ýurt 2030-njy ýyla çenli 26 million gektar tokaýy dikeltmegi meýilleşdirýär. 2015-nji ýyldan bäri bu ýerde tokaý örtüginiň arassa ösüşi 191 000 gektar bolup, bu dünýäde üçünji görkezijidir.
