Nvidia, Netflix we Apple işgär başyna düşýän girdejiniň ululygy boýunça tehnologiýa kompaniýalarynyň arasynda öňdebaryjylar boldy. Şeýle statistikany OnDeck kompaniýasy hödürledi.
Işgär başyna girdeji (RPE) kompaniýanyň işiniň netijeliliginiň giňden ýaýran görkezijisi bolup, işçi güýjüniň öndürijiligine baha bermek üçin ulanylýar. Ol kompaniýanyň umumy girdejisini işgärleriniň sanyna bölmek arkaly hasaplanýar.
Tehnologiýa ägirtleriniň arasynda işgär başyna iň ýokary girdejini Nvidia görkezdi – 4 408 784 dollar. Ikinji orunda 4 153 125 dollar bilen Netflix ýerleşdi.
Üçünji orny eýelän Apple üçin bu görkeziji beýlekiler bilen deňeşdirilende ujypsyz ýaly görünýär – 2 413 171 dollar. Şol bir wagtyň özünde, kompaniýa jemi 164 müň işgäri bilen şeýle ýokary görkezijilere ýetmegi bilen tapawutlanýar. Işgärleriň köpüsi bölek söwdada zähmet çekýär.
Sanawyň yzyny dowam etdirýär: Meta (2,2 mln dollar), Alphabet (Google-yň baş kompaniýasy, 1,9 mln dollar), Uber (1,4 mln dollar), Microsoft (1,1 mln dollar), Tesla (761 708 dollar), Adobe (734 666 dollar) we Salesforce (498 684 dollar).
Eger ähli pudagy göz öňünde tutsaň, onda amerikan kompaniýalarynyň arasynda iň ýokary görkezijini gozgalmaýan emläge eýeçilik edýän we ony myhmanhanalar hem kazino üçin kärendesine berýän VICI Properties görkezýär. 27 işgäri bolan bu kompaniýa olaryň her biri üçin, takmynan, 142 mln dollar gazanýar.
Dünýä derejesinde RPE boýunça iň ýokary görkeziji Hindistanyň altyn gazyp almak bilen meşgullanýan Rajesh Exports kompaniýasyna degişlidir. Ol işgär başyna 307 mln dollar gazanýar.
Deňeşdirmek üçin, McDonald’s 172 800 dollar, Starbucks 171 185 dollar gazanýar.
Iş ýüzünde RPE-ni netijeliligiň iň gowy görkezijisi diýip atlandyryp bolmaz, çünki ol işiň maddy däl taraplaryny, mysal üçin korporatiw medeniýeti göz öňünde tutmaýar.
