Italiýa ymykly tomusky wagta geçmek prosesini işe girizýär. Bu sagatlaryň indi ýylda iki gezek üýtgedilmejekdigini aňladýar. Parlamente bu başlangyjy goldamak haýyşy bilen 352 müň gol goýlan arza tabşyryldy.
Deputatlar şeýle geçişiň energiýanyň sarp edilişine, daşky gurşawa, raýatlaryň saglygyna we howpsuzlygyna nähili täsir etjekdigine baha berer. Bu başlangyç Italiýanyň ekologiki lukmançylyk jemgyýeti (SIMA) tarapyndan goldanyldy. Eger ol tassyklansa, 2026-njy ýylyň 30-njy iýunyna çenli hemişelik tomusky wagt barada kanuny teklip taýýarlanar.
Bilermenler tomusky wagta geçmegiň, takmynan, 720 mln kilowatt/sagat elektrik energiýasyny we ýylda 180 mln ýewro tygşytlamaga mümkinçilik berjekdigini belleýär. Şeýle-de, söwdanyň we restoranlaryň işiniň ösmegine, syýahatçylyk möwsüminiň uzamagyna we howpsuzlygyň ýokarlanmagyna garaşylýar. Mundan başga-da, bu adamlaryň saglygyna oňyn täsir eder.
Italiýada tomusky wagt 1966-njy ýylda girizildi, soňra ony Ýewropa ýurtlarynyň köpüsi kabul etdi. Ilkibaşda bu energiýany tygşytlamak we gündiziň ýagtylygyny has köp ulanmak üçin edildi. 2018-nji ýylda Ýewropa Komissiýasynyň jemgyýetçilik geňeşmelerinde gatnaşyjylaryň, takmynan, 84%-i wagtyň möwsümleýin üýtgedilmeginiň ýatyrylmagyny goldady, Ýewroparlament bolsa 2019-njy ýylda ýurtlara saýlamak erkinligini berýän direktiwany makullady, ýöne gutarnykly çözgüt entek kabul edilmedi.
