25-nji noýabrda Türkmenistanyň Ylymlar akademiýasynyň Prezidenti A.Aşirowyň ýolbaşçylygyndaky türkmen wekiliýeti Italiýada ýerleşýän Palasso Walentini köşgünde geçirilen halkara maslahata gatnaşdy.
Türkmenistanyň Italiýadaky ilçihanasynyň hem-de Italiýanyň Aziýa institutynyň (ISIA) bilelikde gurnamagynda geçirilen maslahat Türkmenistanyň hemişelik Bitaraplygynyň 30 ýyllygyna we Garaşsyzlygynyň 34 ýyllygyna, şeýle hem Halkara parahatçylyk we ynanyşmak ýylyna bagyşlandy diýip, Türkmenistanyň DIM-nde habar berdiler.
Maslahatyň çäklerinde türkmen halkynyň beýik şahyry Magtymguly Pyragynyň saýlanan eserleriniň ýygyndysynyň italýan dilindäki täze neşiriniň tanyşdyrylyşy hem geçirildi.
Maslahata diplomatlar, döwlet guramalarynyň we Italiýanyň ylym-bilim ulgamlarynyň wekilleri gatnaşdylar. Çärede Türkmenistanyň Ylymlar akademiýasynyň Prezidenti A.Aşirow, Türkmenistanyň Italiýadaky ilçisi T.Kömekow, Magtymguly adyndaky Dil, edebiýat we milli golýazmalar institutynyň direktorynyň orunbasary H.Durdyýew, şeýle hem italýan tarapdan ISIA-nyň Prezidenti M.Morgoni, ISIA-nyň Baş sekretary D.Palmiýeri, Kapitoliýa ýygnagynyň geňeşçisi F.Santori, Medeniýet, ylym we bilim meseleleri boýunça deputat I.Mansi çykyş etdiler.
Maslahatda 2025-nji ýylyň 12-nji dekabrynda Aşgabat şäherinde Halkara parahatçylyk we ynanyşmak ýylyna, Halkara Bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanyp geçiriljek Halkara forumyň wajyplygyna hem aýratyn ähmiýet berildi.
Şeýle hem çykyşlarda beýik türkmen şahyry Magtymguly Pyragynyň döredijiligine hem orun berildi. Magtymguly Pyragynyň eserleriniň italýan dilinde neşir edilmegi iki ýurduň arasynda üstünlikli ynsanperwer hyzmatdaşlygyň alamatyna öwrülendigi bellenildi. Bu ýygynda Türkmenistanyň Ylymlar akademiýasynyň hünärmenleriniň maslahat bermeginde Italiýanyň gündogarşynas alymlary tarapyndan terjime edilen 130 goşgy girdi.
Şol gün türkmen wekiliýetiniň Rim şäheriniň Medeni miras bölüminiň ýolbaşçysy Klaudio Parizi Presiççe, Italiýanyň Senatynyň Bilim we medeni miras boýunça hemişelik komissiýasynyň senatory Françesko Werduççi, şeýle hem Italiýanyň Uniwersitetler we ylmy barlaglar ministrliginiň Ylym we innowasiýalar ministriniň birinji orunbasary doktor Janluiji Konsoli bilen duşuşyklar geçirildi.
Bir gün öň, Italiýa saparynyň çäklerinde türkmen wekiliýeti Akwasparta şäherine baryp gördi. Şäheriň häkimi Jowanni Montani wekiliýeti mähirli garşylady. Türkmen wekiliýeti Ýewropanyň ilkinji ylymlar akademiýalarynyň biri bolan Linçei akademiýasynyň dörän ýeri – Palazzo Çezä baryp gördi hem-de Italiýanyň öňdebaryjy medeniýet we ylym merkezleriniň biri bilen tanyşdy.
