15-nji aprelde Prezident Serdar Berdimuhamedow Italiýa Respublikasynyň täze bellenen Adatdan daşary we Doly ygtyýarly ilçisi Martin Brugy kabul etdi.
Diplomat döwlet Baştutanyna ynanç hatlaryny gowşurdy we oňa Italiýanyň Prezidenti Serjio Mattarellanyň salamyny ýetirdi. Ol Türkmenistanda Italiýa wekilçilik etmegiň özi üçin uly hormatdygyny aýdyp, Aşgabadyň binagärlik keşbiniň we ekologik derejesiniň özünde uly täsir galdyrandygyny hem sözüniň üstüne goşdy.
Prezident ilçini täze wezipä bellenilmegi bilen gutlady we hyzmatdaşlygy, şol sanda Ýewropa Bileleşiginiň döwletleri bilen giň gerimli gatnaşyklaryň çäklerinde berkitmäge taýýardygyny tassyklady.
Ýurtlar eýýäm BMG, Ýewropa Bileleşigi hem-de Ýewropada Howpsuzlyk we Hyzmatdaşlyk guramasy ýaly düzümleriň çäklerinde netijeli hyzmatdaşlyk edýär. Geçen ýyl Gazagystan Respublikasynyň Astana şäherinde geçirilen «Merkezi Aziýa — Italiýa» formatyndaky birinji sammit munuň aýdyň mysalydyr.
Taraplar ykdysadyýet, energetika, ulag-logistika ulgamy we oba hojalygyndaky hyzmatdaşlygyň geljegini ara alyp maslahatlaşdy. Mysal hökmünde ýangyç-energetika pudagynda iri taslamalary amala aşyrýan Italiýanyň «Eni» kompaniýasyna üns çekildi.
Şeýle hem Ýewraziýa giňişliginde söwda gatnaşyklaryny giňeltmäge ýardam berýän Demirgazyk — Günorta we Gündogar — Günbatar ulag geçelgelerini ösdürmek meselelerine garaldy.
Bilim, ylym we medeniýet ulgamyndaky hyzmatdaşlyga aýratyn üns berildi. Hususan-da, arheologiýa we muzeý işi boýunça işjeň gatnaşyklar alnyp barylýar. Munuň bilen birlikde, Türkmenistanda häzirki wagtda italýan dilini öwrenmäge bolan gyzyklanmanyň uludygy bellenildi.
Martin Bruk Italiýanyň Türkmenistana hemişelik bitaraplyk hukuk derejesine ygrarly bolan ygtybarly hyzmatdaş hökmünde garaýandygyny nygtady. Ilçi öz tarapyndan iki ýurduň arasyndaky dostlukly gatnaşyklary has-da berkitmek üçin tagallalaryny gaýgyrmajakdygyna ynandyrdy.
