14-nji aprelde daşary işler ministri Raşid Meredow Italiýanyň Türkmenistandaky täze bellenen ilçisi Martin Brugy kabul etdi. Diplomat özüniň ynanç hatlarynyň nusgalaryny gowşurdy.
Ministr ilçini wezipä girişmegi bilen gutlady we döwletara gatnaşyklary berkitmek işinde üstünlikleri arzuw etdi.
Taraplar ikitaraplaýyn gepleşikleriň yzygiderli ösýändigini belläp, Türkmenistanyň Prezidenti Serdar Berdimuhamedowyň 2025-nji ýylyň oktýabr aýynda Italiýa amala aşyran resmi saparynyň ähmiýetini nygtady.
Gepleşikleriň dowamynda söwda-ykdysady, maýa goýum we medeni ulgamlardaky hyzmatdaşlygyň geljegi ara alnyp maslahatlaşyldy. Işewürlik forumlarynyň geçirilmeginiň möhümdigi we mundan ozal Rimde geçirilen «Türkmenistanyň gadymy siwilizasiýalary» atly arheologik serginiň üstünligi bellenilip geçildi.
Diplomatlar, şeýle hem halkara guramalaryň, ilkinji nobatda, BMG-niň çäklerinde hyzmatdaşlygy dowam etdirmäge taýýardyklaryny tassyklady.
