Joby Aviation amerikan kompaniýasy BAE-de iki nokadyň arasynda özüniň elektrik uçýan enjamynyň ilkinji adamly uçuşyny amala aşyrdy. Dik uçuş enjamy Margamdaky synag bazasyndan uçup, Al-Maktum halkara howa menziline gondy – uçuş 17 minut dowam etdi diýip, Business Wire habar berýär.
Bu uçuş tehnologiýanyň adaty uçarlar we dikuçarlar bilen birlikde täjirçilik ulanylyşy üçin taýýardygyny görkezdi. Dronlardan tapawutlylykda, uçýan enjam adam tarapyndan dolandyryldy we awiasiýa düzgünlerini berjaý etdi. Kompaniýa her gün Dubai Airshow 2025 sergisinde on müňlerçe tomaşaçynyň öňünde görkeziş uçuşlaryny geçirýär.
Şol bir wagtyň özünde, Joby bilen Dubaýyň Ýol we ulag edarasy (RTA) dik uçuş we gonuş üçin üç sany täze meýdançanyň guruljakdygy barada habar berdi. Olar Dubai Mall-da, Atlantis the Royal-da we Dubaýyň Amerikan uniwersitetiniň ýanynda peýda bolar. Dubaýyň Halkara howa menzilindäki meýdança bilen birlikde dört stansiýa aerotaksi üçin ilkinji gatnaw ulgamyny emele getirer. Ilkinji meýdança eýýäm 60% taýýar we ýylda 42 müň gonuşa hem 170 müň ýolagça niýetlenýär.
Joby elektrik aerotaksisi ýol wagtyny azaldýar – mysal üçin, howa menzilinden Palm-Jumeýra çenli ýol 45 minutyň deregine 10 minut töweregi wagt alýar. Enjam batareýada işleýär, şol sebäpli zyýanly gaz goýbermeýär. Birnäçe elektrik hereketlendirijisinden ybarat ulgam bolsa howpsuzlygy ýokarlandyrýar. Täjirçilik gatnawlary 2026-njy ýylyň birinji çärýeginde başlar.
