Google täze nesil emeli aň modelini – Gemini 3-i hödürledi. Kompaniýa ony Gemini hatarynda iň ösen we hemmetaraplaýyn model diýip atlandyrýar. Ol eýýäm Gemini programmasynda, Google gözleginiň AI režiminde, şeýle-de işläp düzüjiler we korporatiw ulanyjylar üçin gurallarda elýeterlidir.
Model Gemini 2.5 çykandan ýedi aýdan soň hödürlendi we Google-yň uly dil modelleriniň arasynda iň kuwwatlysy boldy. Tanyşdyrylyş OpenAI-iň GPT-5.1 modeli çykandan bir hepdeden az wagtdan soň we Anthropic-iň Sonnet 4.5 modeli çykandan iki aý soň boldy.
Esasy synaglarda Gemini 3 Pro şeýle netijeleri görkezdi:
- ·LMArena-da 1501 bal (logika we netije çykarmak)
- ·GPQA Diamond-da 91,9% (soraglara çuň düşünmek)
- ·SimpleQA Verified-de 72,1% takyklyk
- ·MMMU-Pro-da 81% we Video-MMMU-da 87,6% (multimodal meseleler)
- ·MathArena Apex-de 23,4% - bu matematikada emeli aňlaryň arasynda iň gowy netije.
Modeliň flagman wersiýasy Gemini 3 Pro bolsa Humanity’s Last Exam testinde rekord goýdy – ol goşmaça gurallary ulanmazdan 37,5% netije görkezdi. Ozal iň ýokary görkeziji 31,64% bolup, ol GPT-5 Pro degişlidi. Humanity’s Last Exam pikir ýöretmek başarnygyna we hünärmen bilimleriniň derejesine baha berýär.
Google munuň bilen bir hatarda Gemini 3 Deep Think režimini hem hödürledi. Ol has çylşyrymly meseleleri çözmäge gönükdirilen bolup, has ýokary netijeleri görkezdi: Humanity’s Last Exam-da 41%, GPQA Diamond-da 93,8% we ARC-AGI-2 testinde 45,1%.
Gemini 3 mobil programmasy arkaly mugt elýeterlidir. Gözlegiň AI režiminde ol häzirlikçe Google AI Pro we Ultra nyrhnamalarynyň tölegli ulanyjylarynda işleýär. Deep Think režimi howpsuzlyk barlagynda bolup, ýakyn hepdelerde Google AI Ultra ulanyjylary üçin elýeterli bolar.
