Şweýsariýaly daýwer Waldemar Bruderer demini saklap, buz astyna çuňluga çümmek boýunça rekord goýdy. Ol ýörite esbap we gidrokostýum bolmazdan 56 metr çuňluga ýetdi diýip, Ginnesiň rekordlar kitaby habar berdi.
Bu 27-nji fewralda Graubýunden kantonyndaky Zils kölünde bolup geçdi. Ýylyň bu döwründe kölde suwuň temperaturasy adatça -11-den +1 gradus aralygynda üýtgeýär.
Brudereriň aýtmagyna görä, suwa çümmek onuň üçin diňe bir synag däl-de, eýsem tebigaty gorap saklamagyň möhümdigi barada ýüzlenme boldy. Ol öz rekordy klimatyň üýtgemegi we buzluklaryň eremegi ýaly meselelere ünsi çeker diýip umyt edýär.
Bruderer kristal ýaly arassa suwuň, suwasty dünýäniň rahatlygynyň we adatdan daşary kynçylyklaryň ony özüne çekýändigini aýtdy.
“Men tebigata aralaşmakdan we ony ilkinji görnüşinde duýmakdan lezzet alýaryn. Esbaplary azaltmak bilen, men tebigy hadysalar bilen güýçli arabaglanyşygy duýýaryn we hakykatdan-da suwasty landşaftlaryň ajaýyplygyna baha berip bilýärin” – diýip, Bruderer belledi.
Şu ýyl ýene bir rekord – erkekleriň arasynda suwda demiňi uzak wagtlap saklamak boýunça rekord goýuldy. Horwatiýadan Witomir Mariçiç suw astynda 29 minut 3 sekunt bolup, öz watandaşy Budimir Şobatyň rekordyny täzeledi. Bu rekord 24 minut 37 sekunt bolup, 2021-nji ýyldan bäri saklanypdy.
