Dubaý ýokary girdejili adamlar üçin iň özüne çekiji şäherleriň reýtinginde birinji orny eýeledi. Reýting Savills Plc emläk dellaly tarapyndan düzüldi.
Barlagda dünýäniň 30 megapolisine baha berildi. Dubaý miras we kapital ösüşi üçin salgytlaryň ýokdugy, ösen infrastrukturasy, howpsuzlygyň ýokary derejesi we halkara mekdepleriň has köpdügi bilen reýtingiň başyna çykdy. Mundan başga-da, BAE-niň ýaşaýjylary ýurtda 10 ýyla çenli ýaşamaga we azyndan 2 mln dirham ($545 müň) maýa goýumda salgyt ýeňilliklerinden peýdalanmaga mümkinçilik berýän “altyn wizany” alyp bilýär.
Ikinji orunda Nýu-Ýork ýerleşdi. Bilermenler işewürlik üçin gowy şertleriň, salgyt ýeňillikleriniň we geosyýasy durnuklylygyň bardygyny belleýär.
Şeýle-de, millionerler üçin şäherleriň ilkinji bäşligine Singapur, Abu-Dabi we Gonkong girdi.
Uly ýaşly baý adamlar üçin miras salgydy meselesi aýratyn möhüm. Şol sebäpli durmuş derejesiniň ýokarydygyna garamazdan, London pes orny eýeledi. Çünki, Britaniýanyň salgyt ulgamy paýtagtda elita emlägine bolan gyzyklanmany peseltdi.
Savills kompaniýasy 2022-nji ýylda pese gaçyşdan soň global baýlygyň dikelendigini belleýär. Ösüş boýunça öňdebaryjy Aziýa-Ýuwaş ummany sebiti boldy. 2024-nji ýylda 680 müňden gowrak täze millioner peýda boldy, 2029-njy ýyla çenli bolsa olaryň sany ýene 5 mln adam artyp biler.
