Prezident Serdar Berdimuhamedow bank ulgamynyň işgärlerini we türkmen halkyny Türkmenistanyň milli pul birliginiň — manadyň dolanyşyga girizilmeginiň 32 ýyllygy bilen gutlady.
Döwlet Baştutany milli pulumyzyň dolanyşyga girizilmeginiň ykdysadyýetimiziň sazlaşykly ösmegi, kadaly pul dolanyşygynyň üpjün edilmegi, ýeke-täk döwlet pul-karz syýasatynyň netijeli alnyp barylmagy hem-de banklaryň ykdysadyýetimiziň pudaklaryna gönükdirýän karzlarynyň möçberiniň artdyrylmagy üçin zerur bolan amatly şertleri döredengini belledi.
Serdar Berdimuhamedow bank ulgamynyň işjeňligini has-da ýokarlandyrmak boýunça alnyp barylýan pul-karz syýasatynyň strategik ugurlary hökmünde pul dolanyşygynyň durnuklylygyny we ýurduň sazlaşykly ösüşini üpjün etmegi, ilatyň ýaşaýyş-durmuş şertlerini has-da gowulandyrmagy, milli ykdysadyýetiň bäsdeşlige ukyplylygyny pugtalandyrmagy, bank ulgamynyň halkara maliýe bazarlaryna utgaşykly goşulyşmagy üçin amatly makroykdysady şertleri döretmegi kesgitldi.
"Bu baş maksada ýetmekde bank ulgamynyň ähmiýeti örän uludyr. Bank ulgamy bazar ykdysadyýetiniň möhüm düzüm bölegi bolmak bilen, onuň işiniň netijesinde uly möçberde pul serişdeleri dolanyşykda bolýar. Erkin pul serişdelerini dolanyşyga girizmek arkaly giňeldilen üznüksiz önümçiligi alyp barmak üçin maýa goýumlaryň çeşmeleri emele gelýär" diýip, döwlet Baştutany belleýär.
Döwlet Baştutanynyň belleýşi ýaly, Türkmenistan Halkara pul gaznasy, Bütindünýä banky, Aziýanyň ösüş banky, Yslam ösüş banky, Ýewropanyň täzeleniş we ösüş banky ýaly abraýly halkara maliýe guramalary hem-de «Fitch Ratings» halkara reýting agentligi bilen özara bähbitli hyzmatdaşlygy ösdürýär.
"Strategik taýdan möhüm bolan iri maýa goýum taslamalaryny uzak we orta möhlete çekilen serişdeleriň hasabyna maliýeleşdirmekde ýurdumyzyň ygtybarly banklarynyň daşary ýurtly taraplar bilen baglaşan şertnamalary hem-de ylalaşyklary aýratyn ähmiýete eýedir" diýip, Serdar Berdimuhamdow belleýär.
