30-njy oktýabr – 13-nji noýabr aralygynda Samarkant şäherinde Birleşen Milletler Guramasynyň Bilim, ylym we medeniýet boýunça guramasynyň (ÝUNESKO) Baş maslahatynyň nobatdaky 43-nji mejlisi geçirilýär. Mejlise Türkmenistanyň medeniýet ministri A.Şamyradowyň ýolbaşçylygyndaky wekiliýet gatnaşýar.
Maslahatyň açylyş dabarasyna ÝUNESKO-nyň işleri barada Türkmenistanyň milli toparynyň jogapkär sekretary Ç.Rüstemowa, Türkmenistanyň Fransiýadaky ilçisi, ÝUNESKO-nyň ýanyndaky Hemişelik wekili M.Çaryýew we Türkmenistanyň Özbegistandaky ilçisi Ş.Meredow gatnaşdy.
Maslahatyň gün tertibine laýyklykda, bölümçelerde ýaşlaryň hukuklaryny we mümkinçiliklerini giňeltmek, parahatçylygy we jemgyýetçilik bitewiligini berkitmek, sanly eýýamda medeniýetleri birleşdirmek, durnukly syýahatçylygy we mirasy gorap saklamagy ösdürmek, şeýle hem milli toparlaryň arasynda gatnaşyklary we tejribe alşygyny kämilleşdirmek meseleleri ara alnyp maslahatlaşyldy.
Maslahatyň çäklerinde Türkmenistanyň medeniýet ministri A.Şamyradow çykyş edip, ÝUNESKO-nyň işleri barada Türkmenistanyň milli toparynyň işiniň möhüm ugurlaryny we durnukly ösüş maksatlaryna ýetmekde halkara hyzmatdaşlygynyň ähmiýetini belledi. Türkmenistanyň ÝUNESKO-nyň işine işjeň gatnaşmagynyň halklaryň arasynda özara düşünişmegi pugtalandyrmaga hem-de bilim, ylym, medeniýet we aragatnaşyk ýaly ugurlarda umumy maksatlary ilerletmäge goşant goşýandygy nygtaldy.
