Antarktidada ýaşy, takmynan, 6 mln ýyla barabar bolan Ýerde iň gadymy buz nusgalary tapyldy. Bu barada Proceedings of the National Academy of Sciences (PNAS) žurnaly habar berýär.
Dürli ýurtlardan ylmy gözlegçiler Gündogar Antarktidadaky Allan baýyrlarynyň töwereginde gözleg işlerini geçirdi. Alymlar silindr kernleri – Antarktidanyň buz galkanynyň jümmüşinden gadymy buz nusgalaryny almak üçin 100 – 200 metr çuňlukda guýy burawladylar.
Ylmy gözlegçileriň maglumatlaryna görä, tapylan nusgalar ozal mälim bolan 2,7 mln ýyllyk iň gadymy buzdan iki esseden gowrak gadymy bolup çykdy. Buzuň içinde uzak geçmişiň atmosferasynyň düzümini öwrenmäge mümkinçilik berýän kiçijik howa köpürjikleri saklanypdyr.
Seljerme soňky 6 mln ýylda bu sebitde temperaturanyň, takmynan, 12 gradus peselendigini görkezdi. Bu şol döwürde Ýeriň klimatynyň häzirkiden has ýyly bolandygyny görkezýär.
