Ýaponiýada “Okada” muzeýi XIX asyrda ýapon suratkeşi Kasusika Hokusaý tarapyndan döredilen meşhur “Kanagawadaky uly tolkun” atly grawýura eseri auksiona çykarar. Söwda 22-nji noýabrda Gonkongda geçiriler we ony “Sotheby’s” auksion öýi gurnar.
Bu grawýura muzeýiň auksiona goýjak 125 sany Aziýa sungat eseriniň arasynda bolup, olaryň satuwy arkaly muzeý esaslandyryjysy, ýaponiýaly milliarder Kasuo Okadanyň bergilerini tölemegi meýilleşdirýär. Ol 2018-nji ýylda işewür Stiw Winn bilen bolan kazyýet işinde öz bähbitlerini gorap çykan “Kobre & Kim” atly hukuk firmasy bilen arasyndaky 50 million dollarlyk bergini üzmeli.
“Sotheby’s-iň" bahalandyrmagyna görä, ähli kolleksiýanyň satuwyndan 50 million dollardan gowrak girdeji gazanylyp bilner.
“Kanagawadaky uly tolkun” Ýaponiýanyň iň meşhur we iň köp gaýtalanýan sungat eserleriniň biri hasaplanýar. Ol Hokusaý tarapyndan 1830–1832-nji ýyllarda döredilen “Fuji dagynyň otuz alty görnüşi” atly grawýura toplumyna girýär. “Okada” muzeýinde ussadyň asyl nusgalarynyň biri saklanýar, galanlary bolsa Tokionyň Milli muzeýinde, Nýu-Ýorkdaky Metropoliten muzeýinde we Londondaky Britan muzeýinde ýerleşýär.
