Şu gün, 20-nji oktýabrda «Arkadagyň Ak ýoly bilen Serhetabat – Hyrat» gaz geçirijisiniň nobatdaky tapgyrynyň gurluşygyna badalga berildi. Dabarada çykyş eden Türkmenistanyň Halk Maslahatynyň Başlygy Gurbanguly Berdimuhamedow bu taslamanyň gurluşygyna owgan raýatlarynyň hem işe çekiljekdigini belledi. Bu barada TDH habar berýär.
Şeýle hem türkmen halkynyň Milli Lideri bu taslamanyň doly durmuşa geçirilmegi bilen owgan halky üçin täze iş orunlarynyň dörejekdigini belledi.
“Ine bu gün bolsa uzynlygy 153 kilometr bolan Arkadagyň Ak ýoly bilen Serhetabat-Hyrat gaz geçirijisiniň Owganystanyň Hyrat welaýatyna barýan nobatdaky tapgyryny dowam etdirmek işleriniň şaýady bolýarys” diýip, türkmen halkynyň Milli Lideri dabarada belledi.
Türkmensitanyň Prezidenti tarapyndan bu taslamany durmuşa geçirmek üçin berk maddy-enjamlaýyn binýat döredildi. Taslamanyň gurluşygy 200-den gowrak täze häzirki zaman kuwwatly tehnikalar bilen üpjün edildi.
Taslamanyň üstünlikli durmuşa geçirilmegi bilen her ýyl Owganystana ortaça 1 milliard amerikan dollaryndan gowrak serişdeler gelip gowşar.
“Munuň özi diňe bir türkmen-owgan gatnaşyklaryna däl, eýsem sebite hem öz oňyn täsirini ýetirer” diýip, Gurbanguly Berdimuhamedow aýtdy.
