Ýewropa Komissiýasy ykdysadyýetiň möhüm on pudagynda emeli aňy ornaşdyrmak boýunça başlangyjyň işe girizilendigini habar berdi. Täze taslamalary durmuşa geçirmek üçin 1 mlrd ýewro bölüp bermek meýilleşdirilýär.
Edara “EA-ny ulanmak boýunça strategiýada” kompaniýalary diňe bir ofis işinde däl, eýsem senagatda, lukmançylykda, farmasewtikada, daşky gurşawyň goragynda we beýleki ugurlarda tehnologiýany işjeň ulanmaga çagyrýar. Ýewrokomissiýanyň tehnologiki garaşsyzlyk, howpsuzlyk we demokratiýa boýunça wise-prezidenti Henna Wirkkunen strategiýanyň maksadynyň ABŞ we Hytaý bilen deňeşdirilende Ýewropanyň bäsdeşlige ukyplylygyny ýokarlandyrmakdygyny aýtdy.
Şol bir wagtyň özünde, hünärmenler çäreleriň netijeliliginiň o diýen ýokary bolup bilmejekdigini belleýär. 2024-nji ýylda ÝB emeli aň ýaly ösen tehnologiýalary maliýeleşdirmek üçin 256 mln ýewro bölüp berdi, ýöne ABŞ şol maksatlara 6 mlrd dollar (5,16 mlrd ýewro) bölüp berdi. ÝB-niň EA taslamalaryna maýa goýumlary 7 mlrd ýewro boldy, ABŞ bolsa şol walýuta geçirilende 58,5 mlrd ýewro, Hytaý 12,9 mlrd ýewro sarp etdi.
Ýylyň ahyryna çenli Ýewrokomissiýa kompaniýalar üçin düzgünleşdiriji talaplary ýeňilleşdirmegi we 2027-nji ýylda güýje girjek “EA barada kanuny” ýönekeýleşdirmegi meýilleşdirýär.
Şeýle-de, strategiýa EA modellerini okatmak üçin “gigafabrikalaryň” gurluşygyny, startaplary goldamagy we saglygy goraýyşda, senagatda, energetikada, logistikada, gurluşykda, oba hojalygynda, goragda, aragatnaşykda we medeniýetde tehnologiýalary giňden ornaşdyrmagy göz öňünde tutýar. Geljekde pudaklaryň sanawy giňelip biler.
