Gazagystanyň Mangistau welaýatynyň Aktau şäherinde geçirilýän «Gorkut Ata» halkara kino festiwalynda täze türkmen filmleri hödürlendi.
Oguz han adyndaky «Türkmenfilm» birleşiginiň wekiliýeti festiwala şu filmleri getirdi: režissýor Batyr Batyrowyň «Kämillige ýol 2: Erjellik» atly çeper filmi, režissýor Hekim Alowowyň «Kitap» atly filmi, režissýor Maksat Gylyjowyň «Ismim düşdi ilden-ile» atly filmi we režissýor Sähragül Janmämmedowanyň «…Senet däldir, ol sungatdyr» atly dokumental hronikasy.
Şeýle hem tomaşaçylara režissýor Wepa Işangulyýewiň «Gürgenç gözeli Törebeg» atly çeper filmi hem-de režissýor Zülfia Kadyrowanyň «Ynsan syrdaşy» atly işi görkeziler.
«Türkmenfilm» birleşiginiň başlygynyň döredijilik meseleleri boýunça orunbasary Sahysalyh Baýramow çeper filmler boýunça eminler toparyna girizildi. Dokumental filmlere bolsa Döwletgeldi Hudaýberdiýew baha berer.
Bäsleşigiň ýeňijileri «Iň gowy çeper film», «Iň gowy režissýor», «Iň gowy ssenari», «Iň gowy aktrisa» we «Iň gowy aktýor» nominasiýalary boýunça kesgitlener. Mundan başga-da, TÜRKSOÝ tarapyndan «Türki medeniýete goşandy üçin» ýörite baýrak gowşurylar.
Festiwala Azerbaýjandan, Gazagystandan, Gyrgyzystandan, Türkmenistandan, Türkiýeden, Özbegistandan we Wengriýadan 250-den gowrak kino ussady gatnaşýar. Çäre 5-nji oktýabra çenli dowam edip, onuň çäginde kino sungatynyň ussatlary bilen döredijilik duşuşyklary guralar we myhmanlara 50-ä golaý bäsleşikli hem-de bäsleşiksiz dürli görnüşli filmler görkeziler.
2024-nji ýylda türk halklarynyň «Gorkut Ata» Halkara kino festiwaly Türkmenistanda geçirilipdi.
