2-nji oktýabrda Prezident Serdar Berdimuhamedow Aşgabat boýunça iş saparyny amala aşyryp, paýtagtymyzda we ýurdumyzyň welaýatlarynda gurulmagy meýilleşdirilýän saglygy goraýyş maksatly desgalaryň şekil taslamalary bilen tanyşdy.
Wise-premýer B.Annamämmedow gurulmagy meýilleşdirilýän saglygy goraýyş maksatly desgalaryň şekil taslamalary we olaryň ýerleşjek ýeriniň çyzgylary barada hasabat berdi.
Hususan-da,
- Aşgabat şäherinde 500 orunlyk köpugurly hassahananyň
- Ahal welaýatynyň Tejen şäherinde 300 orunlyk köpugurly hassahananyň
- Daşoguz welaýatynyň Daşoguz şäherinde 400 orunlyk Enäniň we çaganyň saglygyny goraýyş merkeziniň
- Aşgabat şäheriniň Bagtyýarlyk etrabynda saglyk öýüniň gurluşygy meýilleşdirilýär.
Prezident Serdar Berdimuhamedow gurulmagy meýilleşdirilýän täze saglygy goraýyş desgalarynyň gurluşyk işlerinde-de ýokary hil derejesiniň üpjün edilmeginiň, olaryň öz wagtynda ulanmaga tabşyrylmagynyň möhümdigini belledi. Serdar Berdimuhamedow bu saglygy goraýyş desgalarynda zähmet çekjek lukmanlaryň ýokary hünär derejesini üpjün etmek meselesine uly ähmiýet bermelidigini we bu ugurda dünýäniň öňdebaryjy klinikalary bilen özara hyzmatdaşlygyň ösdürilmeginiň, hususan-da, onlaýn okuw sapaklarynyň guralmagynyň zerurdygyny belledi.
Şeýle hem Serdar Berdimuhamedow degişli ýolbaşçylaryň gatnaşmagynda iş maslahatyny geçirdi. Onda ýurdumyzyň saglygy goraýyş ulgamynda alnyp barylýan işleriň ýagdaýyna seredildi.
Maslahatyň barşynda wise-premýerler B.Annamämmedow, B.Orazdurdyýewa, Aşgabat şäheriniň häkimi R.Gandymow, saglygy goraýyş we derman senagaty ministri M.Mämmedow hasabat bilen çykyş etdiler.
Döwlet Baştutany 10-njy oktýabrda ýurdumyzda Saglygy goraýyş we derman senagaty işgärleriniň gününiň giňden bellenip, şu mynasybetli köp sanly möhüm ähmiýetli çäreler, şol sanda halkara çäreleriň geçiriljekdigini aýtdy. Bu senede saglygy goraýyş desgalary açylyp ulanmaga berler.
Döwlet Baştutany Saglygy goraýyş we derman senagaty işgärleriniň güni mynasybetli saglygy goraýyş desgalarynyň düýbüni tutmak dabarasyna gowy taýýarlyk görmegiň, «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergini we ylmy maslahaty ýokary derejede geçirmek boýunça guramaçylyk işlerini geçirmegiň zerurdygyna ünsi çekip, bu babatda degişli ýolbaşçylara anyk tabşyryklary berdi.
