Prezident Serdar Berdimuhamedow Türkmenistanyň hormatly ýaşulularyny we mähriban enelerini Ýaşulularyň halkara güni mynasybetli gutlady.
Döwlet Baştutanynyň gutlagynda belleýşi ýaly, ýaşululara çäksiz hormatyň nyşany hökmünde Aşgabat we Arkadag şäherlerini, tutuş ýurdumyzy gurşap alýan aýdym-sazly dabaralar hem-de baý many-mazmunly medeni-jemgyýetçilik çäreleri geçirilýär.
"Biziň alyp barýan syýasatymyzyň esasynda jemgyýetimiziň we döwletimiziň iň ýokary gymmatlygy hasaplanýan adamyň bähbidi durýar. Şundan ugur alyp, merdana halkymyzyň ýaşaýyş-durmuş derejesiniň yzygiderli ýokarlandyrylmagy üçin ähli zerur şertleri döredýäris, ýurdumyzyň her bir raýaty, aýratyn-da, ýaşuly nesillerimiz hakynda uly alada edýäris" diýip, döwlet Baştutany belleýär.
Prezident Serdar Berdimuhamedow agzybirligimizi has-da pugtalandyrmakda, watansöýüji nesilleri terbiýeläp ýetişdirmekde jemgyýetimiziň ýaşuly nesliniň wekilleriniň aýratyn uly ornunyň bardygyny belleýär.
"Siziň parasatly wesýetleriňiz, öwüt-ündewleriňiz Garaşsyz, hemişelik Bitarap Watanymyzy ýürekden söýýän, ýokary ahlak häsiýetlerini, watansöýüjiligiň belent düşünjelerini özünde jemleýän, ynsanperwer ýörelgelerimize, asylly däp-dessurlarymyza ygrarly ogul-gyzlary terbiýelemekde özboluşly mekdepdir".
"Agzybirligimizi pugtalandyrmakda hem-de täze sepgitlere tarap ynamly öňe gitmekde, ýaş nesillerimizde Watanyň mukaddesligi, gymmaty hakyndaky düşünjeleri, belent ahlagy we milli häsiýetleri kemala getirmekde aýratyn hyzmatlary bitiren dilleri senaly ýaşuly nesliň wekillerine Türkmenistanyň «Hormatly il ýaşulusy» diýen hormatly adynyň dakylmagy hem-de «Zenan kalby» ordeniniň dabaraly gowşurylmagy has-da guwandyryjydyr" diýlip, gutlagda bellenilýär.
