RIA Nowosti agentliginiň analitikleri açyk maglumatlaryň esasynda dünýäniň iň uly ykdysadyýetleriniň paýtagtlarynda bir otagly öýi kärendesine almagyň bahasyny hasaplady. Hasaplamalara görä, ýaşaýyş jaýy Londonda we Singapurda has gymmata düşýär – aýda 2,7 müň dollardan gowrak.
Londonda bir otagly öýüň kärendesi ortaça 2,7 müň dollara barabar bolsa, şäheriň merkezinde ol 3,1 müň dollara hem ýetýär. Singapurda baha birneme pes, ýöne 2,7 müň dollardan geçýär.
Waşingtonda (ABŞ) ýaşaýyş jaýy ortaça 2,3 müň dollara düşýär, Amsterdamda bolsa, takmynan, 50 dollar arzan. Dublinde (Irlandiýa) bir otagly öýüň ortaça kärende bahasy, takmynan, 2,2 müň dollara deň.
Kärende bahalary ýokary bolan paýtagtlaryň onlugyna ortaça 2,16 müň dollar bilen Reýkýawik (Islandiýa) hem girýär, onuň yzyndan Lýuksemburg we Gonkong (2 müň dollar), Şweýsariýanyň Bern şäheri (1,8 müň dollar) we Daniýanyň Kopengagen şäheri (1,75 müň dollar) gelýär.
Iň arzan öý Bangladeşiň paýtagtynda – Dakkada bar, bu ýerde ortaça aýlyk kärende tölegi 93 dollardan geçmeýär. Yslamabatda (Pakistan) öý 158 dollara, Lusakada (Zambiýa) we Kairde (Müsür) 175 dollara, Alžirde 184 dollara düşer. Nýu-Delide (Hindistan) bir otagly öýi, takmynan, 185 dollara kärendesine alyp bolýar.
