Keniýaly ylgawçy Lilian Odira 800 m aralyga ylgamakda dünýä çempiony boldy. Final 21-nji sentýabrda Tokioda 2025-nji ýylyň Ýeňil atletika boýunça dünýä çempionatynyň çäklerinde geçirildi.
Odira bu aralygy 1.54,62 netije bilen geçip, dünýä çempionatynyň täze rekordyny goýdy.
Ikinji orny Beýik Britaniýanyň wekili Jorjiýa Bell eýeledi, ol 1.54,90 netijäni görkezdi. 2024-nji ýylyň Olimpiýa çempiony, britaniýaly Kili Hojkinson pellehana üçünji bolup geldi (1.54,91).
Şol gün 5000 m ylgawda hem ýeňijiler kesgitlendi. Altyn medaly amerikaly Koul Hoker aldy, ol bu aralygy 12 minut 58,30 sekuntda ylgap geçdi. Kümüş medaly belgiýaly türgen Isaak Kimeli gazandy (12.58,77). Bürünç medala fransiýaly Jimmi Gressýe mynasyp boldy (12.59,33). Norwegiýadan Olimpiýa çempiony Ýakob Igebrigtsen 13.02,00 netije bilen 10-njy orny eýeledi.
