Baku gämi gurluşyk zawodynda 8 müň tonna ýük göterijilikli nebit daşaýan tankeriň gurluşygy alnyp barylýar. Ol Azerbaýjanyň adyndan Türkmenistan üçin sowgat hökmünde, iki ýurduň arasyndaky doganlyk gatnaşyklarynyň nyşany hökmünde berler. Bu barada Azerbaýjanyň ykdysadyýet ministriniň orunbasary Sahyp Nureddin Alekperow Awazadaky TIF 2025 Maýa goýum forumynda çykyş edip aýtdy.
Alekperow bu taslamanyň şu ýylyň ahyrynda ýa-da indiki ýylyň başynda tamamlanmagy meýilleşdirilýändigini belledi. Onuň sözlerine görä, gurluşyk iki ýurduň gämi gurluşygy ugry boýunça hyzmatdaşlygynyň çäginde alnyp barylýar.
Çykyşynda ol ulag hyzmatdaşlygynyň giňelmegine garaşylýandygyny hem nygtady we Awazada (Türkmenistan – Azerbaýjan – Özbegistan) golaýda geçirilen üçtaraplaýyn duşuşygy ýatladyp, ulag hyzmatdaşlygyny ösdürmek boýunça baglaşylan Ähtnamalara ünsi çekdi. Onuň bellemegine görä, gazanylan ylalaşyklar ýurtlaryň arasyndaky işewür, syýahatçylyk we ynsanperwer gatnaşyklary berkitmäge mümkinçilik berer.
Alekperow şeýle hem Türkmenistanyň we Azerbaýjanyň logistiki baglanyşygynyň ähli yklym ýurtlary üçin peýdalydygyny nygtady.
«Öň ähli ýol Rim şäherine barýar diýilse, indi ähli ýol Türkmenistanyň üsti bilen geçýär diýip bileris. Sebäbi bu Ýewropa bilen Aziýanyň arasyndaky iň gysga ýol» diýip, ýolbaşçy belledi.
Mundan başga-da, Alekperow Azerbaýjanda senagat, ulag, gurluşyk, söwda we hyzmat ulgamynda türkmen kapitaly bilen döredilen 78 sany kärhananyň üstünlikli işländigini aýtdy.
TIF 2025 forumy Hazar deňziniň kenarynda, Awazada geçirilip, işewür toparlaryň hem-de halkara guramalarynyň wekillerini birleşdirýär.
