Iň uly amerikan tehnologiýa kompaniýalary 31 mlrd funt sterling möçberde (42,3 mlrd dollar) Beýik Britaniýa maýa goýumlary yglan etdi. Bu barada Bi-bi-si habar berýär.
Bu bildiriş ABŞ-nyň Prezidenti Donald Tramp döwlet sapary bilen Londona gelen güni aýdyldy. Britan hökümeti ABŞ bilen emeli aňyň, kwant hasaplamalarynyň we ýadro energetikasynyň ösüşine gönükdirilen “tehnologiýa şertnamasyna” gol çekilendigini habar berdi.
Ylalaşyga görä, Microsoft serwer infrastrukturasyna, EA pudagynda taslamalara we Londonyň töwereginde täze superkompýuteri döretmäge 22 mlrd funt sterling maýa goýar. Google Londonyň golaýyndaky Uoltem-Kross şäherinde maglumat merkeziniň gurluşygyna we EA pudagynda gözleglere 5 mlrd funt sterling maýa goýar.
Çip öndürijisi Nvidia Beýik Britaniýany Stargate UK taslamasynyň çäklerinde 120 müň grafiki prosessor bilen üpjün eder. Taslama Britaniýanyň Nscale kompaniýasy we OpenAI amerikan kompaniýasy bilen bilelikde durmuşa geçirilýär. Bu Ýewropada hasaplaýyş güýçleriniň iň uly klasterini döretmäge mümkinçilik berer.
CoreWeave kompaniýasy Şotlandiýanyň DataVita kompaniýasy bilen bilelikde energiýa taýdan netijeli maglumat merkezleriniň gurluşygyna 1,5 mlrd funt sterling maýa goýar.
