Duşenbe güni Tesla kompaniýasynyň baş direktory Ilon Mask 2020-nji ýyldan bäri ilkinji gezek, takmynan, 1 mlrd dollarlyk paýnama satyn alandan soň, kompaniýanyň paýnamalary sişenbe güni söwdada 8,7% gymmatlady. Günüň ahyryna çenli ösüş 7,4% boldy diýip, Yahoo Finance habar berýär.
Maýadarlar bu satyn alşy robotaksileri we adam şekilli robotlary ösdürmäge ünsi gönükdirýän kompaniýa bolan ynamyň alamaty hökmünde kabul etdi. Şonuň netijesinde Tesla-nyň kagyzlary aprel aýyndaky pese gaçyşdan doly dikeldi.
4-nji aprelde 221,86 dollar derejesinde iň pes ýyllyk görkezijä ýetileni bäri kompaniýanyň paýnamalary 85% ýokarlandy. Ösüşe robotaksileriň işe girizilmegi, Maskyň Waşingtondan gitmegi we ýurtda üçünji syýasy partiýany döretmek meýilnamasyny togtatmagy hem bellibir derejede ýardam etdi.
Şol bir wagtyň özünde kompaniýanyň bäsdeşi – Hytaýyň BYD elektromobil öndürijisi satuw paýy boýunça Tesla-ny gysyp çykardy. Mundan başga-da, ABŞ-da elektrokarlara salgyt ýeňillikleriniň hereket ediş möhletiniň tamamlanmagy maýadarlary alada goýýar.
Iýunda Tesla Tehas ştatynyň Ostin şäherinde sürüjisiz taksi hyzmatyny işe girizdi. Mask Optimus gumanoid robotlaryny-da kompaniýanyň geljekki ösüşiniň esasy hereketlendirijisi hasaplaýar. Onuň aýtmagyna görä, geljekde Tesla-nyň bahasynyň 80%-i gündelik işleri ýerine ýetirip biljek robotlaryň hasabyna emele geler.
