Tbiliside Türkmenistanyň ilçisi Döwletmyrat Seýitmämmedow bilen gruziýaly kinematograf Tengiz Malania duşuşdy. Duşuşyk iki ýurduň köpugurly gatnaşyklary barada dokumental film döretmek mowzugyna bagyşlandy.
Ilçi Türkmenistanyň hemişelik Bitaraplygynyň 30 ýyllygyna hem-de 2025-nji ýylyň Halkara parahatçylyk we ynanyşmak ýyly diýlip yglan edilmegine bagyşlanjak çäreler barada aýtdy. Bu seneler filmiň mazmunlaýyn esasynda öwrülip, Türkmenistanyň we Gruziýanyň arasyndaky dost-doganlygyň hem-de hyzmatdaşlygyň çuňlugyny açyp görkezmek maksady goýulýar.
Geljekki film Gruziýanyň Medeniýet ministrliginiň goldawy bilen amala aşyrylyp, hyzmatdaşlygyň esasy ugurlaryny — syýasaty, ykdysadyýeti, ulag gatnaşyklaryny we medeni alyş-çalyşygy özünde jemlär.
Taraplar bu taslamanyň medeni diplomatiýanyň nusgasy bolup hyzmat etjekdigine, ikitaraplaýyn gatnaşyklary taryha ýazyp, halklaryň arasyndaky gatnaşyklary berkitmäge ýardam etjek täze bilelikdäki başlangyçlara mümkinçilik açjakdygyna ynam bildirdiler.
