ChatGPT-den her hepde peýdalanýan ulanyjylaryň sany 700 million adama, ýagny Ýer şarynyň uly ýaşly ilatynyň 10 göterimine barabar. Bu barada OpenAI kompaniýasynyň çap eden makalasynda aýdylýar.
Makalada beýleki gyzykly maglumatlar hem getirilýär. Mysal üçin, ulanyjylar çat-bota soňky wagtlar köplenç iş maksady bilen däl-de, şahsy meseleler bilen has köp ýüz tutýar. Häzir OpenAI-ň döreden emeli aňyna iş bilen baglanyşykly soraglar boýunça ýüz tutýanlaryň sany 27%-e çenli azalypdyr, bary-ýogy bir ýyl öň bu görkeziji 47%-e deňdi.
Ýüzlenmeleriň köpüsi amaly maslahatlar, maglumat gözlegi, her dürli teklipler ýa-da tekst redaktirlemesi bilen bilen baglanyşykly. Gepleşikleriň takmynan 80%-i şu ugurlara degişli.
Ulanyjylar 49% ýagdaýda ChatGPT-den maslahat soraýar ýa-da maglumat alasy gelýär, 40% ýagdaýda belli bir meseläni çözüp bermegi, mysal üçin, tekst ýa-da kompýuter kody ýazmagy tabşyrýar. Gepleşikleriň galan 11%-inde bolsa adamlar hiç hili maglumat islemän, çat-bot bilen diňe pikir alyşýar ýa-da duýgylaryny paýlaşýar.
ChatGPT-niň ilkinji wersiýasy 2022-nji ýylyň ahyrynda köpçülige elýeterli boldy. 2025-nji ýylyň awgustynyň başynda OpenAI özüniň täze ChatGPT 5 modelini hödürledi.
