Prezident Serdar Berdimuhamedow «Türkmeniň Altyn asyry» baýragyny almak ugrundaky bäsleşigiň çäklerinde geçirilýän höwesjeň aýdymçy ýaşlaryň «Ýaňlan, Diýarym!» telebäsleşiginiň jemleýji tapgyryna gatnaşyjylara gutlagyny iberdi.
Döwlet Baştutany gatnaşyjylara ýurdumyzda amala aşyrylýan beýik özgertmeleri, ýurdumyzyň dünýä bileleşigindäki belent at-abraýyny, ajaýyp döwrümizi, halkymyzyň bagtyýar durmuşyny joşgunly wasp edýän kämil aýdym-sazlary döretmekde mundan beýläk-de uly üstünlikleri arzuw etdi.
Serdar Berdimuhamedow «Ýaňlan, Diýarym!» telebäsleşiginiň jemleýji tapgyryna gatnaşmagyň we çykyş etmegiň aýdymçylar üçin uly bagtdygyny, ýatdan çykmajak şatlykly wakalaryň biridigini belleýär.
"Höwesjeň aýdymçy ýaşlarymyzyň geljekde ýüreklere ylham berýän, ajaýyp zamanamyzy, bagtyýar durmuşymyzy wasp edýän döwrebap aýdym-sazlary has-da joşgunly ýerine ýetirjekdiklerine, milli sungatymyzyň ösmegine öz mynasyp goşantlaryny goşjakdyklaryna berk ynanýaryn" diýip, döwlet Baştutany belleýär.
5-nji sentýabrda geçirilen Hökümet mejlisinde wise-premýer B.Seýidowa “Ýaňlan, Diýarym!” telebäsleşiginiň jemleýji tapgyryny geçirmäge görülýän taýýarlyk barada hasabat berdi. Bellenilişi ýaly, zehinli aýdymçylar Türkmenistanyň Prezidentiniň “Türkmeniň Altyn asyry” atly baýragyny almak ugrundaky bäsleşigiň çäklerinde höwesjeň aýdymçy ýaşlaryň arasynda yglan edilen “Ýaňlan, Diýarym!” telebäsleşiginiň Halkara parahatçylyk we ynanyşmak ýylynda döwlet derejesinde geçirilýän jemleýji tapgyryna gatnaşmaga hukuk gazandylar. Bu telebäsleşigiň jemleýji tapgyryny “Aşgabat” aýdym-saz merkezinde geçirmek meýilleşdirilýär.
