Pekin uniwersitetiniň barlagçylary adam bedeniniň ýylylygyny elektrik energiýasyna öwürýän rezin materialy işläp taýýarladylar diýip, South China Morning Post habar berýär.
Täze tehnologiýa termoelektrik ýörelgelerine esaslanýar: bedeniň (37° C töweregi) we daşky gurşawyň (20–30 ° C) arasyndaky temperatura tapawudy elektrik energiýasyny öndürmäge mümkinçilik berýär.
Alymlaryň düşündirişine görä, esasy element ýarymgeçiriji polimerleriň we elastik reziniň garyndysy bolan gibrid gurluşdyr. Gurlan nanosüýümleriň ulgamy, ýokary elektrik geçirijiligini saklamak bilen, materialy berk we sozulagan edýär.
Işläp taýýarlama amaly taýdan ulanmak üçin mümkinçilikleri açýar. Bu material smart-sagatlara awtomatiki usulda zarýad bermek ýa-da elektrik togunyň elýeter bolmadyk uzak sebitlerinde enjamlary işletmek üçin ulanylyp bilner. Mundan başga-da, barlagçylar tehnologiýany dokma pudagyna ornaşdyrmak barada hem pikir edýärler: ol egin-eşige oturdylmak bilen telefona zarýad berip ýa-da bedeniň gyzgynlygyny kadalaşdyryp biler.
Täze material lukmançylykda hem peýdaly bolup biler. Mysal üçin, häzirki wagtda ýürek-damar ulgamy gözden geçirilende hassalar bir hepdeläp ýörite elektron enjamlary geýip gezmeli bolýarlar, çeýe termoelektrik rezini ulanmak bolsa şeýle amallary has amatly eder.
