Azerbaýjanyň Prezidenti Ilham Aliýew Türkmenistanyň Halk Maslahatynyň Başlygy Gurbanguly Berdimuhamedowa iberen hatynda 2025-nji ýylyň 12-nji dekabrynda Aşgabatda geçiriljek Halkara parahatçylyk we ynanyşmak ýylyna bagyşlanan foruma gatnaşmaga çakylygy üçin hoşallygyny bildirdi. Hat metbugatda çap edildi.
Ilham Aliýew Türkmenistanyň başlangyjy boýunça BMG-niň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmeginiň Türkmenistanyň halkara parahatçylygy, howpsuzlygy pugtalandyrmaga goşýan goşandyna dünýä bileleşigi tarapyndan berlen ýokary bahanyň güwäsidigini belleýär.
"Azerbaýjan doganlyk ýurt hökmünde hemişe Türkmenistanyň Bitaraplyk hukuk ýagdaýyna hormat goýýar. Şoňa görä-de, Azerbaýjan Respublikasynyň BMG-niň Baş Assambleýasynyň 1995-nji we 2015-nji ýyllarda kabul eden Türkmenistanyň Bitaraplygy hakyndaky Kararnamalarynyň awtordaşy bolup çykyş etmegi tötänden däldir. Türkmenistanda geçiriljek Halkara parahatçylyk we ynanyşmak ýylyna bagyşlanan forumyň ählumumy parahatçylygy we durnuklylygy pugtalandyrmaga, gapma-garşylyklary aradan aýyrmaga, umuman, BMG-niň maksatlaryny durmuşa geçirmäge möhüm goşant goşjakdygyna berk ynanýaryn. Forumyň işine üstünlik arzuw edýärin" diýlip, hatda nygtalýar.
