OpenAI tiz wagtdan Hindistanda ilkinji ofisini açjakdygyny habar berdi. Wekilhana ýakyn aýlarda Nýu-Delide işläp başlar. Kompaniýa eýýäm ýurtda ýuridik şahs hökmünde hasaba alyndy we ýerli hünärmenler toparyny döredýär.
Şeýle çözgüt hindi ulanyjylary üçin aýda 5 dollar bahadan ChatGPT-niň arzan nyrh meýilnamasynyň işe girizilmegi bilen baglanyşyklydyr. Bu teklip Hindistanyň köpçülikleýin bazary üçin iň amatlysy boldy.
Ýurt internet ulanyjylarynyň we smartfonlaryň sany boýunça dünýäde ikinji orny eýeleýär. Soňky bir ýylda Hindistanda ChatGPT-niň gündelik ulanyjylarynyň sany dört esse artdy. OpenAI bu bazarda Google we Meta ýaly iri oýunçylar, şeýle-de Perplexity ýaly täze serwisler bilen bäsleşýär.
Kompaniýa döwlet edaralary, işläp düzüjiler we bilim guramalary bilen hyzmatdaşlygy ýola goýmagy maksat edinýär. Baş direktor Sem Altmanyň aýtmagyna görä, ofisiň we ýerli toparyň döredilmegi EA tehnologiýalaryny tutuş ýurtda elýeterli etmekde we Hindistan bilen bilelikde Hindistan üçin gurallary işläp düzmekde möhüm ädim bolar.
OpenAI ilkinji başlangyçlar hökmünde Hindistanda bilim sammitini we işläp düzüjileriň ilkinji duşuşygyny geçirer. Bu çözgüt kompaniýanyň Aziýadaky ornuny berkitmek boýunça strategiýasyny dowam etdirýär: öň kompaniýanyň ilkinji ofisleri Ýaponiýada, Singapurda we Günorta Koreýada peýda boldy.
