Kwinslend uniwersitetiniň ýanyndaky Freýzer institutynyň barlaghanasyndan awstraliýaly alymlar ilkinji gezek doly derejede adam derisiniň gurluşyny gaýtalaýan deri nusgalaryny ösdürip ýetişdirdi. Bu barada ABC ýaýlym korporasiýasy habar berdi.
“Biziň pikirimizçe, indi näsag çagalary bolan köp ene-atalara zyýan ýetirýän seýrek keselleri bejermegiň täze usullaryny tapmak boýunça täze mümkinçilikler açylýar” – diýip, Freýzer institutynyň müdiri Kiýaraş Hosroutehrani belledi.
Nusgalary döretmek üçin sütün öýjükleri ulanyldy. Munuň netijesinde gan aýlanyş damarlaryny, inçejik gan damarlaryny, tüý follikullaryny, birnäçe gat dokumany we immun öýjüklerini döretmek başartdy. Ylmy gözlegçileriň aýtmagyna görä, täze nusga has ýuka we diňe bir öýjük görnüşini öz içine alan öňki görnüşlerden has kämil boldy.
ABC-niň maglumatlaryna görä, Kwinslend ştaty yssy howasy bilen tapawutlanýar we deriniň rak keseliniň ýüze çykmak ýagdaýlarynyň sany boýunça dünýäde birinji orny eýeleýär. Her ýyl sebitiň 3,6 müňden gowrak ýaşaýjysynda melanoma ýüze çykarylýar.
