"Prada" we "Axiom Space" kompaniýalary LCVG (suwuklyk bilen sowadýan we wentilýasiýa edýän eşik) atly içki sowadyjy we wentilýasiýa eşigini tanyşdyrdylar. Ol astronomlaryň Aýyň üstünde işleýän wagty beden temperaturasyny saklamak we wentilýasiýany üpjün etmek üçin niýetlenendir.
Bu eşik NASA-nyň "Artemis IV" missiýasy üçin niýetlenen "AxEMU" aý skafandrynyň içki gatlagy bolar. Ol adamyň bedeni bilen göni galtaşýar. Onuň esasy bölegini esasy myşsa toparlarynyň ugrunda ýerleşdirilen turbalar torundan düzülen ulgam emele getirýär. Olaryň içinden fiziki işjeňlik wagty emele gelýän yssyny aýyrýan sowadylan suw aýlanýar. Soňra ýylylyk özbaşdak ýaşaýyş üpjünçilik ulgamyna geçirilýär we daşky gurşawa çykarylýar.
Ulgam sekiz sagada çenli dowam edýän kosmos gämisinden daşary işjeňlik üçin niýetlenendir. Ygtybarlylygy ýokarlandyrmak üçin näsazlyk ýüze çykan ýagdaýynda esasy sowadyjy kontury çalyşmaga ukyply ätiýaçlyk kontury göz öňünde tutulypdyr.
LCVG wentilýasiýany hem üpjün edýär. Aýratyn turbalar ulgamy arkaly astronawtyň ýüzüne kislorod berilýär, dem alnanda çykarylýan uglerod gazy bolsa aýrylýar we ýaşaýyş üpjünçilik blogunda arassalanýar.
"Prada" dizaýn gurluşyny taslamaga, üç ölçegli (3D) modellaşdyrmaga, biçüw tehnologiýalaryny işläp düzmäge we materiallary saýlamaga gatnaşdy.
