Microsoft 2030-njy ýyla çenli adamlar kompýuterleri sesi, gözi we hatda pikirleri bilen dolandyrar diýip hasaplaýar. Windows operasion ulgamynyň geljegi baradaky garaýyşlaryny kompaniýanyň wise-prezidenti Dewid Ueston paýlaşdy.
Onuň sözlerine görä, emeli aň Windows şahsy kompýuterleriniň merkezi elementine öwrüler. Copilot AI kömekçisi eýýäm häzirden ulgamyň dürli böleklerine ornaşdyryldy, ýöne geljekki bäş ýylda onuň orny ep-esli giňeler. Microsoft munuň adaty enjamlaryň - syçanlaryň we klawiaturalaryň zerurlygyny aradan aýrar diýip hasaplaýar. Munuň ýerine ulanyjylar multimodal täsir ediş usullaryny: sesi, göreji, beýni signallaryny ulanarlar.
"Meniň pikirimçe, gözümizi az ulanarys we kompýuter bilen has köp aragatnaşyk saklarys. Şeýle hem, Windows we beýleki Microsoft operasion ulgamlarynyň geljekki wersiýasy bilen multimodal görnüşde aragatnaşyk saklap biljekdigimize ynanýaryn. Kompýuter biziň görýänlerimizi görer, eşidýänlerimizi eşider we biz onuň bilen gepleşeris hem-de has çylşyrymly wezipeleri ýerine ýetirmegini haýyş ederis. Bu aragatnaşygyň has tebigy görnüşi bolmaly. Biziň syçan we klawiatura ulanýan dünýämiz, Z nesle MS-DOS-y ulanmagyň geň-taňlyk bolşy ýaly, ýat bolar” diýip, Ueston belleýär.
Bu tehnologiýalaryň käbiri eýýäm Windows 12-de peýda bolup biler. Onuň çykjak takyk senesi entek belli däl. Insaýderleriň berýän maglumatlaryna görä, ilkinji gezek belki 2026-njy ýa-da 2027-nji ýylda çykyp biler, ýöne seneleri 2030-njy ýyla çenli gijikdirilip bilner.
Şeýle hem, Ueston kwant kompýuterleriniň hasaplamagyň geljegidigine ynanýar. Onuň pikirine görä, olar ägirt uly hasaplaýyş güýjüni üpjün eder we operasion ulgamlarynyň howpsuzlygyny ýokarlandyrar.
