Tesla öz esaslandyryjysy we baş direktory Ilon Maska 96 million paýnamanyň berilmegini tassyklady. Häzirki bazar bahalarynda olaryň bahasy 29 milliard dollardan geçýär. Bu barada kompaniýanyň paýdarlara ýazan hatynda aýdylýar.
Resminamada bu kararyň "Ilonyň güýç-kuwwatyny Tesla jemlemegi" üçin kabul edilendigi düşündirýär. Şeýle hem, Maskyň "soňky sekiz ýylda saldamly kompensasiýa almandygyny" nygtalýar.
Ilon Mask kompaniýanyň iň uly paýdary bolup galmak bilen, kompaniýanyň paýlarynyň 13%-ine eýeçilik edýär. 2018-nji ýylda Tesla onuň bilen şertnama baglaşdy we oňa görä, ol 100 milliard dollardan geçen pursadyndan başlap, bazar kapitallaşdyrmasy üçin her 50 milliard dollar üçin paýlaryň 1%-ini almalydy. Emma 2024-nji ýylda Delawer ştatynyň kazyýeti şol şertnamanyň ýerine ýetirilmegini petikledi we şol wagtky 55,8 milliard dollar hakyň “çenden çykmadygyny” aýtdy. Kazyýet şeýle tölegi beýleki paýdarlar babatda adalatsyzlyk hasaplady.
Täze karar, esasanam, 2025-nji ýylyň başyndan bäri Tesla-nyň paýnamalarynyň 25% pese gaçmagy sebäpli, ýene bir gezek tankydy seslenmeleri döredip biler. Bu esasan Maskyň aýdýan pikirleri, syýasy işjeňligi we käbir alyjylaryň hem-de maýadarlaryň arasynda nägileligi döreden, model hatarynyň könelmegi we hytaý öndürijileriniň bäsdeşliginiň ýokarlanmagy bilen baglanyşykly. Kompaniýanyň girdejisi 2024-nji ýylyň üçünji çärýeginden bäri ösüş görkezmedi. 2025-nji ýylyň ikinji çärýeginde Teslanyň girdejisi 12%, arassa girdejisi 16% azaldy.
