4-nji awgustda Türkmenistanyň Halk Maslahatynyň Başlygy Gurbanguly Berdimuhamedow BMG-niň Deňze çykalgasy bolmadyk ösüp barýan ýurtlar boýunça üçünji maslahatyna gatnaşmak üçin ýurdumyza gelen Özbegistanyň Prezidenti Şawkat Mirziýoýew bilen duşuşdy. Bu barada "Watan" habarlar gepleşiginde habar berildi.
BMG-niň dünýä ähmiýetli meselelerini öz içine alýan, deňze çykalgasy bolmadyk ösüp barýan ýurtlar boýunça üçünji maslahatyna gatnaşmaga çakylyk üçin minnetdarlyk bildirip, Prezident Şawkat Mirziýoýew Awazada geçirilýän halkara forumyň gatnaşygyna uly hormat hökmünde garaýandygyny nygtady.
Şu günki ýokary derejeli maslahatyň häzirki zamanyň möhüm meseleleriniň ara alnyp maslahatlaşyljak möhüm çäresine öwrüljekdigi bellenildi.
Duşuşykda döwletara gatnaşyklaryň utgaşykly ösdürilýändigi, özara söwda dolanyşygynyň yzygiderli artýandygy nygtaldy. Munuň özi goňşuçylyk gatnaşyklarynyň täze hil derejesine çykandygyny görkezýär. Şunuň bilen baglylykda, abraýly halkara guramalaryň çäklerinde hyzmatdaşlygy dowam etdirmek meselesine aýratyn üns berildi.
Iki döwletiň Liderleri mähirli arzuw-alşyklaryndan soň, ýurtlaryň hem-de halklaryň arasyndaky hyzmatdaşlygyň giňeldiljekdigine berk ynam bildirdiler. Duşuşykda Konferensiýanyň taryhy ähmiýetine aýratyn üns berlip, onuň netijeleriniň gatnaşyjy ýurtlaryň ykdysady ösüşine itergi berjekdigi nygtaldy.
