14–28-nji iýul aralygynda Myrat Garryýew adyndaky Türkmenistanyň Döwlet lukmançylyk uniwersitetiniň talyplary Hytaýyň däp bolan lukmançylygy boýunça Pekin uniwersitetinde önümçilik tejribeligini geçdiler.
Hytaý tarapy geljekki türkmen lukmanlary üçin baý okuw we medeni maksatnamany taýýarlady. Talyplar öňdebaryjy professorlaryň umumy sapaklaryna gatnaşdylar, däp bolan hytaý lukmançylygynyň usullary boýunça sapaklarda boldular. Tejribeler Pekin uniwersitetiniň klinikalarynda tejribeli hünärmenleriň ýolbaşçylygynda geçirildi.
Okuw çäreleri talyplara okuwyň dowamynda alan bilimlerini çuňlaşdyrmaga hem-de keselleriň bejergisi we öňüni alşynyň däp bolan we häzirki zaman usullary boýunça amaly başarnyklary edinmäge mümkinçilik berdi.
Mundan başga-da, tejribe alyşmak üçin hytaý lukmançylygynyň taryhyna we däplerine bagyşlanan sergileri öz içine alýan medeni maksatnama guraldy.
Tomusky tejribelik Myrat Garryýew adyndaky Türkmenistanyň Döwlet lukmançylyk uniwersiteti bilen Hytaýyň däp bolan lukmançylygy boýunça Pekin uniwersitetiniň arasyndaky hyzmatdaşlyk hakyndaky Ylalaşygyň çäklerinde geçirildi. Resminama bilelikdäki okuw maksatnamalaryny we taslamalaryny durmuşa geçirmegi, ylmy gözlegleri alyp barmagy, şeýle hem akademiki alyş-çalyşlary göz öňünde tutýar.
