Eýran üç sany täze halkara demirýol ugruny işe girizmek meýilnamasyny mälim etdi. Olaryň arasynda Eýranyň demirgazyk-gündogaryndaky Maşat şäheri bilen Türkmenistanyň Mary şäheriniň arasyndaky gatnaw hem bar. Bu barada Eýranyň Milli demirýol kompaniýasynyň (RAJA) baş direktory Jabbar Ali Zakeri "Borna news" agentligine habar berdi.
Zakeriniň sözlerine görä, Maşat — Mary ugry Eýranyň Merkezi Aziýa ýurtlary bilen ykdysady we söwda gatnaşyklaryny ösdürmekde goşmaça mümkinçilikleri açar. Bu ugur işe girizilenden soňra eýranly ýolagçylar üçin Özbegistana we Täjigistana gitmek has ýeňilleşer, bu bolsa Türkmenistanyň sebitara gatnawlarda üstaşyr halka hökmünde artýan ähmiýetini görkezýär.
Zakeri, şeýle hem, Türkmenistanyň ulag-logistika infrastrukturasyny ösdürmek boýunça işjeň çäreler görýändigini, Aziýa bilen Ýewropanyň arasynda esasy ulag geçelgesi bolmaga ymtylýandygyny belledi. Mary arkaly täze ugur sebitiň ýolagçy we ýük gatnawlarynda türkmen demirýollarynyň strategik ähmiýetini tassyklaýar.
Türkmenistana ugradyljak ugurdan başga-da, Eýran Tährandan Ankara, şeýle hem Tähran we Maşatdan Owganystanyň Hyrat şäherine ýolagçy demirýol ugurlaryny açmagy meýilleşdirýär. Bu taslamalar sebitiň ýurtlary bilen ulag gatnaşyklaryny giňeltmäge we ýolagçy gatnawlarynyň möçberini artdyrmaga gönükdirilendir.
Mundan ozal, Eýranyň ulag ministri Farzane Sadeg Aşgabada saparynyň netijesinde, Maşat — Mary ýolagçy demirýol ugrunyň synag işe girizilişi barada Türkmenistanyň ýolbaşçylary bilen deslapky ylalaşyklara gelnendigini habar beripdi.
