Türkmenistanyň Halk Maslahatynyň Başlygy Gurbanguly Berdimuhamedow Balkan welaýatyna iş saparyny amala aşyryp, Türkmenbaşy Halkara howa menzilinde döredilen döwrebap şertler bilen tanyşdy.
Saparynyň çäklerinde türkmen halkynyň Milli Lideri BMG-niň Deňze çykalgasy bolmadyk ösüp barýan ýurtlar boýunça üçünji maslahatyny geçirmek babatda guramaçylyk döwlet toparynyň alyp barýan taýýarlyk işleriniň ýagdaýy bilen tanyşdy. Mälim bolşy ýaly, bu forum awgust aýynyň başynda «Awaza» milli syýahatçylyk zolagynda geçiriler.
Gurbanguly Berdimuhamedow foruma gatnaşmaga geljek myhmanlara howa menzilinde ýokary hilli hyzmatlaryň üpjün edilmegi boýunça ýerine ýetirilýän işleriň ýagdaýy bilen tanyşdy.
Türkmen halkynyň Milli Lideri howa menzili bilen tanyşlygyň dowamynda bu ýerde ýerleşýän söwda nokatlarynda hyzmatlaryň ýokary hiliniň üpjün edilmelidigini, myhmanlar üçin ýörite sowgatlyklaryň taýýarlanylmalydygyny belläp, öz maslahatlaryny berdi.
Häzirki wagtda myhmanlaryň Türkmenbaşy Halkara howa menziliniň pasportlary resmileşdirmek hem-de gümrük nokatlaryndan gysga wagtyň içinde geçmekleri üçin ähli zerur şertleri döretmek babatda möhüm işler amala aşyrylýar.
Türkmen halkynyň Milli Lideri howa menziliniň halkara gatnawlaryň ýolagçy terminalyna baryp, pasportlary resmileşdirmek nokadyndan geçdi. Soňra gümrük geçiş nokadyndan geçip, bu ýerde döredilen döwrebap şertler bilen tanyşdy.
Soňra Gahryman Arkadagymyz howa menziline gelip gowşan hojalyk ugrunda ulanyljak täze tehnikalaryň aýratynlyklary bilen tanyşdy.
Gurbanguly Berdimuhamedow ýokary tizlikli sport awtoulagynda howa menziliniň uçuş-gonuş zolagynyň tekizligini, uçarlaryň uçmagy we gonmagy üçin amatlylyk ýagdaýyny hem synagdan geçirdi.
Türkmen halkynyň Milli Lideri ýolugra howa menziline barýan ýoluň özboluşly aýratynlyklaryny synlady. Soňra Gurbanguly Berdimuhamedow “Awaza” milli syýahatçylyk zolagynda ýerleşýän dabaraly medeni çäreleriň geçirilýän ýerine baryp, bu ýerde alnyp barylýan gurluşyk işleriniň barşy bilen tanyşdy.
