Paleontologlaryň halkara topary ýura döwrüniň äpet ihtiozawry bolan temnodontozawryň keşbini dikeldip, onuň özboluşly aýratynlygyny ýüze çykardylar. Onuň suwda ýüzýärkä sesi basmaga ukyply ýüzgüçleri bolupdyr diýip, Nature žurnalynda çap edilen barlagyň netijesinde aýdylýar.
Alymlar gadymy deňiz süýrenijileriniň arasynda hakyky ägirdi bolan temnodontozawryň gowy saklanan galyndylaryny öwrenmek üçin alty ýyl sarp etdiler. Süňküň bölekleri Germaniýanyň günorta-günbataryndan tapyldy we birnäçe ýyldan soň olar Şwesiýanyň Lund uniwersitetiniň taslama ýolbaşçysy doktor Ýohan Lindgreniň laboratoriýasyna düşdi.
Paleontologlaryňky şowuna düşdi – olaryň eline diňe bir süňkleriň däl, eýsem ýumşak dokumalaryň hem galyndylary bardy. Bu jandaryň ganata meňzeş ýüzgüji has hem gowy saklanypdyr.
Temnodontozawr 183 million ýyl töweregi ozal deňizlerde ýaşapdyr. Seljermäniň netijesine görä, onuň öň ýüzgüjiniň uzynlygy bir metr töweregi bolup, albatrosyň ganatyna meňzäpdir we soňky çärýek böleginde tutuşlygyna kekirdewükden durupdyr. Kelte aýaklarynyň arka gyralary egrem-bugram şekilli bolup, kekirdewük ösüntgiler bilen örtülipdir, olara "hondrodermler" diýilýär.
Alymlaryň aýtmagyna görä, temnodontozawryň uzynlygy 9-10 metr bolup, oňurgaly haýwanlaryň içinde iň uly gözlüsi hasaplanýar. Gözi futbol topunyň ululygynda bolupdyr. Ýiti gözleri garaňkyda aw etmäge mümkinçilik beripdir.
Bu gözleglere gatnaşan paleontolog Dean Lomaks "Men müňlerçe ihtiozawry gördüm, ýöne muňa meňzeşi hiç duşmady. Bu açyş gadymy haýwanlary dikeltmäge çemeleşmämizi üýtgeder" - diýip, barlaga gatnaşan paleontolog Din Lomaks gürrüň berdi.
