Türkmenistan bilen Rumyniýa Ykdysady, ylmy we tehniki hyzmatdaşlyk boýunça Hökümetara toparyň 8-nji mejlisine taýýarlanyp başladylar. Mejlis 2025-nji ýylyň güýzünde Buharesde geçiriler.
Bu mesele Türkmenistanyň Rumyniýadaky ilçisi Annamämmet Annaýew bilen Rumyniýanyň Maýa goýum we daşarky söwda agentliginiň wise-prezidenti Doru-Klaudian Frunzulikeniň arasynda geçirilen duşuşygyň esasy mowzugy boldy.
Duşuşyk Rumyniýanyň paýtagtynda geçirildi. Bu barada Türkmenistanyň diplomatik wekilhanasynyň sosial ulgamlarynda habar berilýär.
Taraplar maýa goýum, söwda, sanly transformasiýa, energetika we ulag ugurlarynda ikitaraplaýyn ykdysady hyzmatdaşlygy güýçlendirmäge özara gyzyklanmalaryny tassykladylar.
Ilçi Annaýew Türkmenistanyň ykdysadyýetini döwrebaplaşdyrmaga we halkara maýa goýum ülňülerine laýyklygy üpjün etmäge çalyşýandygyny nygtady. Frunzulike bolsa, Türkmenistan bilen dürli ugurlarda hyzmatdaşlygy artdyrmaga gyzyklanma bildirdi.
Türkmen tarapy rumyn kompaniýalaryny Türkmenistandaky halkara sergilere, işewürlik forumlaryna we bäsleşiklerine gatnaşmaga çagyrdy. Öz gezeginde, rumyn tarapy orta we uzak möhletli taslamalary durmuşa geçirmäge gyzyklanma bildirýän türkmen telekeçileri üçin maýa goýum maglumatlaryny hödürledi.
Gepleşikleriň dowamynda taraplar strategik hyzmatdaşlygy çuňlaşdyrmaga we durnukly işewür gatnaşyklary ösdürmäge taýýardygyny tassykladylar.
