15-nji iýulda Türkmenistanyň Hytaý Halk Respublikasyndaky ilçisi P.Durdyýew Aziýanyň infrastruktura maýa goýum bankynyň (AIIB) prezidenti, direktorlar geňeşiniň başlygy Szin Liçun bilen duşuşdy. Bu barada Türkmenistanyň DIM-niň metbugat gullugy habar berýär.
Duşuşygyň başynda AIIB-nyň prezidenti Szin Liçun bankyň Türkmenistan bilen bagly tejribesini paýlaşdy hem-de geljekde hyzmatdaşlyk etmek baradaky meýlini beýan etdi. Bankyň ýolbaşçysy şu ýylyň 4-8-nji awgusty aralygynda “Awaza” milli syýahatçylyk zolagynda geçirilmegi meýilleşdirilýän Deňze çykalgasy bolmadyk ösüp barýan ýurtlar boýunça üçünji maslahatyna (LLDC3) gatnaşmagy meýilleşdirýändigi nygtady. Şeýle-de, bu çäräniň çäklerinde bankyň pawilýonyny guramaga meýilleriniň bardygyny beýan etdi.
Hoşniýetli we dostlukly ýagdaýda geçen duşuşygyň barşynda, taraplar hyzmatdaşlygyň giň ugurlary boýunça pikir alyşdylar. Şeýle hem türkmen tarapy duşuşygyň dowamynda Türkmenistanyň häzirki zaman daşary syýasaty, halkara hyzmatdaşlygyndaky işjeň alyp barýan hereketleri barada giňişleýin gürrüň berdi.
Türkmen wekiliýeti bankyň prezidentine we bu edaranyň kitaphanasyna Magtymguly Pyragynyň goşgularynyň hytaý dilindäki neşirini sowgat hökmünde gowşurdy.
