Renault kompaniýasy täze orta ululykdaky Boreal krossowerini hödürledi. Ol Dacia Bigster modeline esaslanýar. Onuň satuwy ýylyň ahyrynda Ýewropadan daşary 70-den gowrak ýurtda başlar. Önümçilik Braziliýada we Türkiýede ýola goýlar.
Renault Boreal kuzowyň reňkindäki radiator gözenegi we “akylly” faralar bilen üýtgedilen öňki bölege eýe boldy. Yzky bölek has ýönekeýleşdi: inçe çyralar, ýiti bamper we ýumşak stilde bäşinji gapy oturdyldy. Şeýle-de, krossower aşakdan alýumin goragy, 19 dýuýmlyk diskler we panorama lýugy bilen üpjün edildi.
Salonda sanly enjam paneli we Google hyzmatlary bilen 10 dýuýmlyk displeý bar. Interýeriň aýratynlyklaryna lazer haşamly paneller, 48 reňkli yşyklandyryş, simsiz zarýad beriş, iki zolak üçin klimat-dolandyryş we on dinamikli Harman Kardon audioulgamy girýär. Bagaž ýeriniň göwrümi yzky oturgyçlar ýygnalan ýagdaýynda 1770 litre barabar.
Krossoweriň uzynlygy – 4556 mm (Bigster-den 14 mm gysga), tigir bazasy – 2702 mm. Model bazara baglylykda 138-den 163 at güýjüne çenli kuwwatly, benzinde ýa-da etanolda işleýän 1,3 litrlik turbo hereketlendirijisi bilen üpjün edildi. Hereketlendiriji alty basgançakly robot bilen bilelikde işleýär, herekete getiriji – öňdäki.
