Türkiýäniň Togg kompaniýasy Mýunhen awtosalonynda täze T10F elektrik liftbegini hödürledi. Bu markanyň T10X krossowerinden soň ikinji modeli boldy. Öndüriji Ýewropa bazaryna çykýandygyny habar berdi: modelleriň ikisi-de sentýabrda Germaniýada satuwa çykar.
T10F-iň uzynlygy 4830 mm, tigir bazasy – 2890 mm. Göwrümi boýunça ol Tesla Model 3-den 110 mm uzyn, ýöne baza ondan bary-ýogy 15 mm geçýär. Ulag iki wersiýada çykarylar: kuwwaty 218 at güýji bolan bir elektrik hereketlendirijisi we 435 at güýji bolan doly herekete getiriji bilen. Soňkusy 100 km/sag çenli tizligini 4,1 sekuntda artdyrýar we 700 Nm aýlanma güýjüni berýär. Bir hereketlendirijili görnüş 88,5 kWt/sag sygymly batareýa bilen üpjün edilýär we bir zarýadda 600 km çenli geçip bilýär.
T10F-iň dizaýny süýri görnüşde ýerine ýetirildi, üçek gara reňke boýaldy. Aerodinamiki garşylyk koeffisiýenti 0,24-e deň. Üpjünçilige baglylykda 17-den 19 dýuýma çenli tigir diskleri oturdylýar.
Salon 12 dýuýmlyk sanly enjam paneli we 29 dýuým digaonally multimedia displeýi bilen üpjün edildi. Şeýle-de, iki zolakly klimat gözegçiligi, 12 dinamikli audioulgam, simsiz zarýad we sürüjä kömek ulgamlarynyň toplumy göz öňünde tutuldy.
Elektromobil öndürýän Togg kompaniýasy Türkiýede 2023-nji ýylyň ahyrynda açyldy. Şol wagt Prezident Rejep Taýyp Ärdogan ýedi ýylyň içinde markanyň 1 mln elektromobilini çykarmagyň meýilleşdirilýändigini aýtdy. 2024-nji ýylda türk bazarynda 30 müň töweregi T10X krossoweri satyldy.
