BMW Group kompaniýasy özüniň iki millionynjy doly elektrikli awtoulagynyň önümçilikden çykandygyny yglan etdi. Eger-de kompaniýa birinji millionyny öndürmek üçin 11 ýyl sarp eden bolsa (2013-nji ýylda çykan BMW i3 modelinden bäri), ikinji million elektromobil bary-ýogy iki ýylyň içinde öndürildi.
Ýubileý awtoulagy Tansanit Blue reňkli BMW i5 M60 xDrive sedany boldy. Bu ulag Germaniýanyň Dingolfing şäherindäki zawodda ýygnaldy we Ispaniýadaky alyja iberildi.
Dingolfingdaky zawod 2021-nji ýylda BMW iX modeli bilen elektromobilleriň köpçülikleýin önümçiligine başlapdy. Häzirki wagtda ol ýerde iX, i5 we i7 modelleri öndürilýär. 2021-nji ýyldan bäri bu kärhana 320 müňden gowrak elektromobil öndürdi — ýagny BMW Group-yň her altynjy elektromobili hut şu zawodda ýygnaldy.
Şeýle-de kompaniýa häzirki wagtda elektromobilleriň BMW-niň ähli nemes zawodlarynda, adaty içinden ýandyrylýan hereketlendirijili ulaglar bilen bir hatarda öndürilýändigini habar berdi. Bu bolsa dürli bazarlardaky islege görä önümçiligi çalt uýgunlaşdyrmaga mümkinçilik berýär.
Geçen ýyl BMW dünýä bazaryna 442,1 müň sany elektromobil ýerledi. Islegiň iň uly ösüşi Ýewropada duş gelýär, emma ABŞ-da we Hytaýda satuw depginleri biraz haýallady. Kompaniýa täze Neue Klasse hatarynyň hasabyna ýagdaýy gowulandyrmaga bil baglaýar.
Belläp geçsek, Germaniýanyň ýene bir iri öndürijisi bolan Volkswagen konserni eýýäm iki millionynjy elektromobilini birinji milliondan bary-ýogy 10 aý soňra çykandygyny mälim edipdi.
