Ferrari ABŞ-da sport awtoulaglary üçin çeýe wodorod baky üçin patent hasaba aldy. Konstruksiýa ýangyç guýulýan we sarp edilýän wagty basyşa baglylykda rezerwuaryň görnüşini we göwrümini üýtgetmegi göz öňünde tutýar.
Patent arzasyna görä, bak deformasiýa edilip bilinýän materialdan ýasalyp, süýri görnüşli materialdan ýasalan ýörite konteýnerde ýerleşdirilýär. Şeýle konstruksiýa rezerwuaryň deformasiýasy wagtynda yranyp-çaýkanmalary azaltmaly we dürli ýüklenmelerde ony durnukly saklamaly.
Häzirki zaman wodorodly awtoulaglarda ýangyç adatça ýokary basyş astynda gaty ballonlarda saklanýar. Mysal üçin, "Toyota Mirai-de" wodorod uglerod süýümli köp gatly rezerwuarda 690 bar basyş astynda saklanýar.
Ferrari täze ýangyç bakyny awtoulagyň yzky okunyň üstünde ýerleşdirmegi meýilleşdirýär. Bu çözgüdiň sport modellerini geljekki ekologik talaplara uýgunlaşdyrmaga we içinden ýandyrylýan hereketlendirijileri ulanmagy saklap galmaga mümkinçilik berjekdigi garaşylýar.
Kompaniýa entek bu oýlap tapyş barada teswir bermedi. Ozal "BMW" özüniň geljegi uly bolan "iX5" krossoweri üçin 700 bara çenli basyşa niýetlenen ýedi sany kompozit ballondan ybarat wodorody saklaýyş ulgamynyň bardygyny habar beripdi.
